nayi dilli | buzurgoṅ ki sahāyatā ke liye
rāshṭrīya star par vishesh prayāsoṅ ki āvashyaktā par bal de rahe haiṅ āmir kħān.
mujhe lagtā hai ke bhārat vishva ke un gine-chune
deshoṅ yā samājoṅ meṅ shāmil hai jahāṅ sānskritik aur pāramparik rūp se buzurgoṅ
ko bahut adhik sammān diyā jātā hai. bhārat sambhavtah ekmātra desh hai jahāṅ
ham baṛoṅ ke prati sammān pradarshit karne ke liye un ke pair chhūte haiṅ.
tasvīr kā dūsrā pahlu ye bhi hai ke vyāvahārik star par aur apne buniyādi ḍhāṅche
ke lihāz se ham apne buzurgoṅ ki dekhbhāl ke māmle meṅ anya deshoṅ se bahut
pīchhe haiṅ. bhāratīya samāj badal rahā hai aur dhīre-dhīre ham saṅyukt parivār
ki sanskriti se ekal parivāroṅ ki or baṛh rahe haiṅ aur is ke sāth hi apne
parivār meṅ baṛe-būṛhoṅ ke prati hamāre sambandh badal rahe haiṅ. āj jo vyakti
kisi baṛe shahar meṅ kām-dhandhe ke silsile meṅ rah rahā hai us ke samaksh
bahut chunautiyāṅ haiṅ. us ke pās kħud ke liye, apne chhoṭe se parivār ke liye
bahut kam samay hai. is badalte paridrishya meṅ għaur kījiye ke hamāre
baṛe-buzurgoṅ ke sāth kyā hotā hai. ham un ke liye kyā karte haiṅ? hameṅ apne
buzurgoṅ ke liye behtar yojanā banāne ki āvashyaktā hai aur sach kaheṅ to kħud
apne liye bhi, kyoṅke der-saber ham sabhi ko us sthiti meṅ pahuṅchnā hai jahāṅ
āj buzurg haiṅ.
varsh 1947 meṅ ausat jīvan avadhi mātr 31 sāl
thi. lihāzā sevānivritti ke bād arthāt 60 sāl ke umr pār kar chuke logoṅ ki
sankhyā adhik nahiṅ rahi hogi. is ke sāth hi us samay saṅyukt parivār ke chalan
ke kāraṇ ek-dūsre ke dekhbhāl ki pravritti bhi thi. āj ausat jīvankāl lagbhag
65 sāl hai. spashṭ hai ke 60 varsh se adhik umr ke logoṅ ki sankhyā svābhāvik
rūp se ūṅchi hai. ab logoṅ ko 75-80 sāl ki umr tak jīte hue dekhnā ek sāmānya
bāt hai. is kā matlab hai riṭāyar hone ke bād vo 20 sāl tak āsāni se jīte haiṅ.
yād rakhiye riṭāyarmenṭ ke bād ye 20 sāl aise hote haiṅ jab hameṅ svāsthya
sambandhi māmloṅ meṅ sab se adhik kħarch hotā hai. kyā hamāre bachche aur ham
binā kisi āy ke 20 se 25 varsh tak zindā rah sakte haiṅ? phir kaun hamāri
dekhbhāl karegā? nishchit hi hamāre bachchoṅ ki ye zimmedāri hai lekin un ki
apni samasyāeṅ ho sakti haiṅ. lihāzā hameṅ is chīz ki or dhyān dene ki
āvashyaktā hai ke jab ham 60 sāl ki umr meṅ sarkāri athavā niji sevā se riṭāyar
hoṅge to hameṅ tab tak āy ke kuchh anya srot banāne ki āvashyaktā hai jab tak
hamāre liye aisā karnā sambhav ho.
ek samāj ke rūp meṅ hamne ek aisā buniyādi ḍhāṅchā
aur saporṭ sisṭam taiyār kar liyā hai jis se ham apne bachchoṅ ki dekhbhāl kar
sakte haiṅ. hamāre bachche chhah se solah varsh ki umr tak kam se kam das sāl
skūl meṅ bitāte haiṅ. is ke pahle un ke liye keji, narsari aur ple skūl jaise
prabandh bhi haiṅ. lekin hamāre buzurgoṅ ke liye samāj meṅ aisā koī saporṭ
sisṭam nahiṅ hai. hameṅ aise adhik se adhik peshevar sangaṭhanoṅ ki āvashyaktā
hai jo buzurgoṅ ko ek sāth lāyeṅ aur unheṅ utpādak banāne ki koshish kareṅ.
hamāri koshish honi chāhiye ke unheṅ riṭāyarmenṭ ke bād bhi achchhā vaqt mile.
vo apne ḍhang se kħarch kar sakeṅ, apne ḍhang se ji sakeṅ. ek udāharaṇ ke rūp
meṅ ham kuchh nanā-nāni athavā dādā-dādi pārk banā sakte haiṅ. desh ke
alag-alag sthānoṅ par sthānīya nikāy, en ji o, sīniyar siṭizan samūh buzurgoṅ
ke liye manoranjan kendra chalā rahe haiṅ athavā un ke liye pārk banāye gaye
haiṅ. unheṅ kabhi-kabhi is ke liye kuchh sarkāri anudān bhi miltā hai athavā
niji dāndātāoṅ yā prāyojakoṅ kā sahyog miltā hai. dilli is māmle me kħās taur
par sakriya hai. yahāṅ aise qarīb 75 manoranjan kendra haiṅ aur dilli sarkār
aisi koshishoṅ ko baṛhāvā dene ke liye kuchh vittīya sahāyatā bhi deti hai.
āvashyaktā ye hai ke is tarah ke prayās rāshṭrīya star par kiye jāyeṅ.
hamāre sho meṅ himānshu rath ne ye ullekh kiyā ke
voṭ dene vāli ābādi kā ek baṛā pratishat 60 varsh se ūpar hai aur ye sankhyā
baṛhti jā rahi hai. yahāṅ tak ke hamāre adhikānsh rājnetā bhi 60 varsh se ūpar
haiṅ. is tathya ke bāvajūd buzurgoṅ ke liye rājnītik star par jo prayās kiye
gaye haiṅ unheṅ paryāpt nahiṅ kahā jā saktā hai. grāmīṇ vikās mantrālay ne
indirā gāndhi næshanal olḍ ej penshan skīm shuru ki hai. is ke tahat għarībi
rekhā ke nīche jīvanyāpan karne vāle 65 varsh se adhik umr ke sabhi vyaktiyoṅ
ko pratimāh 200 rupaye ki penshan di jāti hai. zyādātar rājya sarkār aisi
yojanāoṅ ke tahat għarībi rekhā se nīche ke buzurgoṅ ko 200 se 500 rupaye
pratimāh ki penshan deti haiṅ, jo āj ke yug meṅ paryāpt nahiṅ kahi jā sakti.
kuchh rājya sarkār is māmle meṅ adhik udār haiṅ.
tamilnāḍ sarkār kārḍdhārakoṅ ko 1000 rupaye aur 20 kilogrām muft chāval deti
hai, jabke bīpīel ke liye 35 kilogrām chāval diye jāte haiṅ. govā āy sambandhi
kisi pratibandh ke binā sabhi sīniyar siṭizanoṅ ko do hazār rupaye pratimāh ki
penshan detā hai. sankshep meṅ kaheṅ to hameṅ ye yād rakhne ki zarūrat hai ke
keval baṛoṅ ke pari chhūnā hi paryāpt nahiṅ hai. sammān kā ye pradarshan keval
paramparā ke kāraṇ ek arthhīn shishṭāchār ban kar nahiṅ rah jānā chāhiye, balke
ye anurāg aur sammān ki sahi bhāvnā ke pradarshan ke sāth-sāth buzurgoṅ ke liye
kuchh karne ki hamāri ākānkshā kā pratīk bannā chāhiye. hameṅ ye bhi kabhi nahiṅ
bhūlnā chāhiye ke āj jahāṅ hamāre buzurg haiṅ kal hameṅ bhi vahiṅ pahuṅchnā
hai.
jay hind, satyameva jayate.
asli lekh dekheṅ: http://in.jagran.yahoo.com/news/national/general/Give-support-honour_5_1_9473403.html
No comments:
Post a Comment