pākistāni adākārā vīnā malik kā kahnā hai ke
vo pākistān se be-intihā muhabbat karti haiṅ aur ye bāt sābit karne ke liye
bhārat ki burāī karnā zarūri nahiṅ hai.
ye bāt unhoṅ ne bi bi si urdu sarvis ke progrām ṭåking
påinṭ meṅ sāmeīn ke savāloṅ ke javāb dete hue kahi.
vīnā malik kā kahnā thā ke vo ek adākārā haiṅ aur
adākār dunyā ke hassāstarīn log hote haiṅ. 'ham adākār andar aur bāhar ek hi tarah
ke hote haiṅ. mujhe apne mulk se pyār hai, yahāṅ ke logoṅ se bhi pyār hai aur
is ke liye zarūri nahiṅ ke paṛosi mulk ki burāī ki jāye. mujhe donoṅ mulkoṅ se
pyār hai.'
vīnā malik kā kahnā thā ke unhoṅ ne apne
mustaqbil ke havāle koī hadaf tai nahiṅ kiyā aur na hi vo āiḍiyalizm par yaqīn
rakhti haiṅ. 'meri manzil kyā hai, ye tai nahiṅ hai is liye har din ko pahlā
aur ākħiri samajhkar jīti huṅ.'
shādi se mutālliq pūchhe gaye savāl par vīnā
malik kā kahnā thā ke abhi us bāre meṅ faislā nahiṅ kiyā. 'abhi mūḍ aur vaqt
nahiṅ hai, jab honi hogi ho jāyegi.'
ek pākistāni ṭelivizħan chænal par māh-e ramzān
meṅ nashr kiye jāne vāle un ke ek progrām 'istigħfār' se mutālliq savāl kā
javāb dete hue vīnā ne kahā ke mazhab un kā zāti māmlā hai aur log ye faislā kaise
kar sakte haiṅ ke un ke aur mazhāb ke darmiyān kis qadr fāslā hai.
'afsos ki bāt ye hai ke logoṅ ne progrām dekhe
bagħair us ke bāre meṅ ye rāy denā shuru kar di ke vīnā ye nahiṅ kar sakti.'
vīnā malik kā kahnā thā ke istigħfar nāmi ye
progrām darhaqīqat ek 'kħūbsūrat' sho thā, jis kā tasavvur ye thā ke us ke
zariye vo islām ke bāre meṅ jān saktiṅ.
'sirf tīs sekanḍ kā promo dekhkar logoṅ ne itnā
shadīd radd-e amal diyā hai, jo bilājavāz hai. agar yahi radd-e amal progrām ke
bād hotā to koī bāt bhi thi.'
vīnā malik kā kahnā thā ke 'istigħfār' nāmi
progrām meṅ vo ye batānā chāhti thiṅ ke māh-e ramzān meṅ kyā kiyā jānā chāhiye.
un kā kahnā thā ke 'ye kisi bhi mazhabi yā mulk se tālluq rakhne vale shakħs ke
liye achchhi bāteṅ thiṅ. log progrām dekhne ke bād faislā kareṅ.'
vīnā malik ne batāyā ke ye progrām yikam ramzān
se nashr honā thā tāham chænal ko dhamkiyāṅ milne ke bād use rok diyā gayā.
ek savāl ke javāb meṅ vīnā malik ne kahā ke
adākāri un kā peshā hai aur vo use nahiṅ chhoṛeṅgi. unhoṅ ne kahā 'adākārā huṅ,
adākārā hi rahūṅgi.'
kuchh arse qibl bhārat meṅ kiye jāne vale
mutanāzā foṭo shūṭ ke bāre meṅ vīnā malik kā kahnā thā ke vo āj bhi us mauqif
par qāim haiṅ ke vo tasāvīr tadvīnshudā thiṅ. 'vo bikini shūṭ thā jise bād meṅ
nyūḍ karke chhāpā gayā.'
vīnā malik ke baqaul jarīde ef ech em (FHM) ke kħilāf
un kā muqaddamā zer-e samāat hai jis meṅ shāyad vaqt lag jāye. tāham vo apni
sākh ki kħātir us ki pairavi karti raheṅgi.
pākistāni siyāsat meṅ āne se mutālliq ek savāl ke
javāb meṅ vīnā malik ne kahā ke vo samāji kām to bahut arse se kar rahi haiṅ
lekin siyāsat ke liye vo kħud ko mauzuṅ nahiṅ samajhtiṅ. tāham unhoṅ ne is bāt
ko kħarij az imkān bhi qarār nahiṅ diyā.
bi bi si ke ek sāme ki jānib se pākistān na āne
ki vajah daryāft karne par vīnā malik kā kahnā thā ke pākistān se bāhar rahne
ki vajah un kā kām hai. baqaul un ke unheṅ bhārat meṅ bahut kām mil rahā hai
jis kā matlab hai ke vahāṅ ke log un se muhabbat karte haiṅ.
unhoṅ ne kahā ke pākistan meṅ log bulāyeṅge to vo
zarūr āyeṅgi. unhoṅ ne 'istigħfār' progrām ki jānib ishārā karte hue kahā ke
'pākistān meṅ bhi kām kar rahi huṅ magar vo logoṅ ko achchhā hi nahiṅ lagtā.'
vīnā malik kā kahnā thā ke vo låbi par yaqīn nahiṅ
rakhtiṅ na hi kisi shakħs ki madad se yahāṅ tak pahuṅchi haiṅ, is liye apni
kāmyābiyoṅ ki vajah vo kħud haiṅ.
No comments:
Post a Comment