pākistān meṅ maujūd rohingyā musalmānoṅ ne barmā meṅ jāri purtashaddud kārravāiyoṅ ke kħilāf mazhabi jamāatoṅ se rābta kiyā hai. in jamāatoṅ ne rohingyā musalmānoṅ ke qatl-e ām ke kħilāf ehtijāj kiyā thā lekin pazīrāī na milne par ye jamāateṅ kħāmosh ho gayiṅ.
karāchi meṅ rohingyā musalmānoṅ ki ek qābil-e zikr tādād maujūd hai, jin meṅ se aksar għairqānūni tārkīn-e vatan haiṅ. rohingyā musalmānoṅ ke ek vafd ne nūr husain arakāni ki qiyādat meṅ jamāat-e islāmi, jamīat-e ulamā-e islām aur dīgar mazhabi jamāatoṅ ke rahnumāoṅ se mulāqāt ki.
nūr husain arakāni kā kahnā hai ke pākistān ke musalmānoṅ ko apne bhāiyoṅ ke liye āvāz buland karni chāhiye. 'musalmān bhāiyoṅ se ham apīl karte haiṅ ke vo mutāsirīn-e rohingyā ki dādrasi kareṅ. vo akħbārāt aur zarāye-e iblāgħ dekhkar sūrat-e hāl kā andāzā lagā sakte haiṅ, kyoṅke us vaqt rohingyā ki himāyat meṅ jo kuchh kiyā jā rahā hai vo āṭe meṅ namak ke barābar hai'.
jamāat ud-dāvā ki jānib se pākistān ke mukħtalif shahroṅ meṅ rohingyā musalmānoṅ ki himāyat meṅ muzāhire kiye gaye the. karāchi meṅ ye ehtijāj barmi kåloni meṅ munāqid kiyā gayā, jamāat ud-dāvā ke amīr hāfiz saīd taslīm karte haiṅ pākistan meṅ is māmle par muassir radd-e amal sāmne nahiṅ āyā.
'rivāyat ke mutābiq jahāṅ bhi musalmānoṅ par zulm hotā hai vahāṅ pākistān shadīd radd-e amal kā izhār kartā hai, hukūmat ki satah par bhi avāmi satah par bhi. lekin ye afsosnāk bāt hai ke yahāṅ par ye radd-e amal sāmne nahiṅ āyā'.
pākistān ki hukūmat ki jānib se is māmle par koī radd-e amal sāmne nahiṅ āyā, jamāat-e islāmi ke amīr munavvar hasan kā kahnā hai ke agar pākistān chāhe to aham kirdār adā kar saktā hai.
'pākistān ki hukūmat agar koshish kare to kaī aur muslim mumālik ko apne sāth milā sakti hai, barmā vafd bhejkar muzākarāt kar sakti hai, bānglādesh hukūmat ko bhi kah sakti hai vo apni sarhadd khol deṅ. is ke ilāvā barmā ke safīr ko talab kar ke bhi bāt ki jā sakti hai'.
vāzeh rahe ke magħribi barmā meṅ taqrīban āṭh lākh rohingyā musalmān ābād haiṅ. barmā ke hukkām kā dāvā hai ke rohingyā naql-e makāni karke vahāṅ pahuṅche haiṅ lekin bānglādesh kā isrār hai ke un logoṅ kā tālluq barmā se hai, is liye unheṅ mulk meṅ āne ki ijāzat nahiṅ di jā sakti.
rohingyā musalmānoṅ ke kħilāf hāliyā purtashaddud vāqeāt ki ibtidā ek buddh mazhab se tālluq rakhne vāli laṛki se jinsi zyādti ke bād hui, jis ke radd-e amal meṅ rohingyā musalmānoṅ ki bastiyoṅ par hamle kiye gaye.
dūsri jānib pākistān meṅ rafāī tanzīm edhi fāunḍeshan ke rūh-e ravāṅ abdussattār edhi ne ailān kiyā hai ke ramzān ke bād vo barmā jākar rohingyā musalmānoṅ ki madad karne kā irādā rakhte haiṅ.
asli mazmūn dekheṅ: http://www.bbc.co.uk/urdu/pakistan/2012/07/120725_burma_muslims_sa.shtml
